អន្តរជាតិ៖ រុស្ស៊ីបាននិយាយកាលពីថ្ងៃចន្ទ ទី២១ ខែមីនា ថាខ្លួនបានវាយប្រហារ ផ្សារទំនើបមួយនៅក្រុង Kyiv ជាមួយនឹងអាវុធរយៈចម្ងាយឆ្ងាយ ដោយសារតែទីតាំងនេះត្រូវបានប្រើប្រាស់ជាឃ្លាំងផ្ទុកគ្រាប់រ៉ុក្កែតកងកម្លាំងអ៊ុយក្រែន។

មជ្ឈមណ្ឌលផ្សារទំនើប Kyiv ត្រូវបានវាយប្រហារកាលពីល្ងាចថ្ងៃអាទិត្យ ដោយបានសម្លាប់មនុស្សយ៉ាងហោចណាស់ ៨នាក់ និងបានបំផ្លាញអគារនៅក្បែរនោះ។

អ្នកនាំពាក្យក្រសួងការពារជាតិរុស្ស៊ី លោក Igor Konashenkov បានប្រាប់អ្នកយកព័ត៌មានថា៖ «អាវុធរយៈចម្ងាយឆ្ងាយដែលមានភាពជាក់លាក់ខ្ពស់នៅយប់ថ្ងៃទី២១ ខែមីនា បានកម្ទេចឃ្លាំងផ្ទុកគ្រាប់រំសេវនៅក្នុងមជ្ឈមណ្ឌលផ្សារទំនើបមួយ»។

ការឈ្លានពានរបស់រុស្ស៊ីលើអ៊ុយក្រែនបានសម្លាប់មនុស្សរាប់ពាន់នាក់ និងធ្វើឱ្យមានការជម្លៀសខ្លួនជាង ១០លាននាក់ បង្កើនការភ័យខ្លាចនៃការប្រឈមមុខដាក់គ្នាកាន់តែខ្លាំងរវាងរុស្ស៊ី និងសហរដ្ឋអាមេរិក។

ប្រធានាធិបតី វ្ល៉ាឌីមៀ ពូទីន និយាយថា «ប្រតិបត្តិការយោធាពិសេស» នៅអ៊ុយក្រែន គឺរឿងចាំបាច់ដោយសារសហរដ្ឋអាមេរិកកំពុងប្រើអ៊ុយក្រែនដើម្បីគំរាមកំហែងរុស្ស៊ី៕